സാമ്പത്തിക വർഷം അവസാനിക്കാറാകുമ്പോൾ നിക്ഷേപകർക്കിടയിൽ ഏറ്റവുമധികം കേൾക്കുന്ന വാക്കാണ് 'ടാക്സ് ഹാർവെസ്റ്റിങ്'. കേൾക്കുമ്പോൾ അല്പം കൗതുകം തോന്നുന്നതോടൊപ്പം, ബുദ്ധിപൂർവ്വം ഉപയോഗിച്ചാൽ നിങ്ങളുടെ ആദായ നികുതി ബാധ്യത ഗണ്യമായി കുറയ്ക്കാൻ ഈ രീതി സഹായിക്കും. ലളിതമായി പറഞ്ഞാൽ, ഓഹരി വിപണിയിലെ നിങ്ങളുടെ നഷ്ടത്തെ ലാഭവുമായി തട്ടിക്കിഴിച്ച് നികുതി ലാഭിക്കുന്ന രീതിയാണിത്.
എങ്ങനെ നടത്താം?
നിങ്ങൾ ഈ വർഷം ഓഹരികളിലോ മ്യൂച്വൽ ഫണ്ടിലോ നിക്ഷേപിച്ച് 2 ലക്ഷം രൂപ ലാഭമുണ്ടാക്കി എന്ന് കരുതുക. ഇതിന് നിങ്ങൾ ആദായ നികുതി നൽകണം. അതേസമയം, നിങ്ങളുടെ പോർട്ട്ഫോളിയോയിൽ ചില ഓഹരികൾ നിലവിൽ 50,000 രൂപ നഷ്ടത്തിലാണെന്നും കരുതുക. നിങ്ങൾ അത് വിൽക്കാതെ കൈവശം വെച്ചിരിക്കുകയാണ്. ഇവിടെയാണ് ടാക്സ് ഹാർവെസ്റ്റിങ് വരുന്നത്. നഷ്ടത്തിലുള്ള ആ ഓഹരികൾ നിങ്ങൾ ഇപ്പോൾ വിൽക്കുന്നു. അപ്പോൾ ആ 50,000 രൂപ നിങ്ങളുടെ 'യഥാർഥ നഷ്ടമായി' മാറുന്നു.
ഇനി നിങ്ങളുടെ മൊത്തം ലാഭം കണക്കാക്കുമ്പോൾ 2 ലക്ഷത്തിൽനിന്ന് ഈ 50,000 കുറയ്ക്കും. അതായത്, നിങ്ങൾ 1.5 ലക്ഷം രൂപയ്ക്ക് മാത്രം നികുതി നൽകിയാൽ മതി. നഷ്ടത്തിന് വിറ്റ അതേ ഓഹരികൾ വേണമെങ്കിൽ തൊട്ടടുത്ത ദിവസം തന്നെ നിങ്ങൾക്ക് തിരികെ വാങ്ങാം. പക്ഷേ, റെക്കോർഡിൽ ആ നഷ്ടം കാണിക്കുന്നത് വഴി നികുതി ഇളവ് ലഭിക്കുന്നു.
ഒരു വർഷത്തിന് മുകളിൽ കൈവശംവെച്ച ഓഹരികളിൽനിന്നുള്ള ലാഭം ഒരുലക്ഷം രൂപ വരെ നികുതി രഹിതമാണ്. ഈ പരിധി പ്രയോജനപ്പെടുത്താൻ പലരും ലാഭത്തിലുള്ള ഓഹരികൾ വിറ്റ് ഉടൻ തന്നെ തിരികെ വാങ്ങാറുണ്ട്. ചുരുക്കത്തിൽ നിങ്ങളുടെ പോർട്ട്ഫോളിയോയിലെ നഷ്ടത്തിലുള്ള നിക്ഷേപങ്ങളെ പുറത്തെടുത്ത്, അതുവഴി നികുതി ഭാരം കുറയ്ക്കുന്ന രീതിയാണ് ടാക്സ് ഹാർവെസ്റ്റിങ്. ഇതിലൂടെ നഷ്ടത്തിനേയും ലാഭമാക്കി മാറ്റാം.
Content Highlights: Mutual fund losses? Here’s how to convert them into tax savings